كوشپەلى وتىرىستا قوستاناي وبلىسىنىڭ اۋىل شارۋاشىلىعى جانە مال شارۋاشىلىعى ونىمدەرىن تەرەڭ وڭدەۋدى دامىتۋ, اگروونەركاسىپتىك كەشەندە جوعارى ءبولىنىس دەڭگەيىندەگى ءونىم ءوندىرۋ كولەمىن ارتتىرۋ, ونەركاسىپتى دامىتۋ جانە يننوۆاتسيالار, ءوڭىر ونەركاسىبىن ءارتاراپتاندىرۋ, جاڭا تەحنولوگيالاردى ەنگىزۋ جانە كاسىپورىنداردىڭ باسەكەگە قابىلەتتىلىگىن ارتتىرۋ, وڭىرلىك عىلىمدى قولداۋ جانە تەحنولوگيالار ترانسفەرى, ءوڭىردىڭ عىلىمي قىزمەتىن كۇشەيتۋ, وندىرىسكە كادر دايارلاۋ, ادامي كاپيتالدى دامىتۋ, ونەركاسىپكە ەكولوگيالىق تۇرعىدان ورنىقتى تەحنولوگيالاردى ەنگىزۋ, ءوندىرىس پەن اگروسەكتوردى تسيفرلىق ترانسفورماتسيالاۋ, ءوڭىر ەكونوميكاسىنا, سونىڭ ىشىندە اۋىل شارۋاشىلىعىنا زاماناۋي تسيفرلىق شەشىمدەر مەن جاساندى ينتەللەكتىنى ەنگىزۋ ءتارىزدى ماسەلەلەر قارالدى.
اقىلبەك كۇرىشباەۆ وسى ۋاقىتقا دەيىن مۇنداي وتىرىستار 8 وبلىستا وتكەنىن, وندا ايماقتىق عىلىمدى دامىتۋ ماسەلەلەرى اگرارلىق, مەديتسينالىق, مۇناي-حيميا, كولىك لوگيستيكاسى مەن يادرولىق ەنەرگەتيكا عىلىمدارىنا باسا نازار اۋدارىلا وتىرىلىپ تالقىلانعانىن ايتا كەلىپ, قوستاناي وبلىسىندا وڭىرلىك عىلىمدى دامىتۋعا باعىتتالعان شارالارعا توقتالدى.
«بۇگىنگى وتىرىسىمىزدىڭ كۇن تارتىبىنە قويىلىپ وتىرعان ماسەلە – قوستاناي وبلىسىنداعى ايماقتىق عىلىمدى دامىتۋدى شيكىزات وڭدەۋ مەن ايماق ەكونوميكاسىنىڭ تۇراقتى دامۋىن قامتاماسىز ەتۋ ماسەلەلەرىمەن ۇيلەستىرە وتىرىپ قاراۋ. بۇل تۇيتكىلدەر كۇن تارتىبىنە كەزدەيسوق قويىلعان جوق. سەبەبى ولار قازىرگى تاڭداعى ەڭ وزەكتى ماسەلەلەردىڭ بىرىنە اينالىپ وتىر. وڭىردە وڭدەۋ سالاسىندا قوسىمشا قۇن قالىپتاستىرۋدىڭ پايدالانىلماعان زور الەۋەتى بار. بۇل ءوندىرىس تيىمدىلىگىن ودان ءارى ارتتىرۋعا جانە جۇيەلى نەگىزدە يمپورتتى الماستىرۋ ماسەلەسىن شەشۋگە مۇمكىندىك بەرەدى. مەملەكەت باسشىسى وسى ماسەلەگە ەرەكشە نازار اۋدارىپ, ءۇش جىل ىشىندە اوك-دەگى وڭدەلگەن ءونىم ۇلەسىن 70%-عا دەيىن ارتتىرۋ مىندەتىن قويدى. بۇل اوك-ءنى عىلىمي-تەحنولوگيالىق جاڭعىرتۋدى, تسيفرلىق شەشىمدەردى ەنگىزۋدى, ۇزدىك الەمدىك تاجىريبەلەردى پايدالانۋدى جانە كليماتتىق وزگەرىستەرگە بەيىمدەلۋدى تالاپ ەتەدى. قوستاناي وبلىسى – اۋىل شارۋاشىلىعى جەر كولەمى 10 ملن گەكتاردان اساتىن, ەلىمىزدەگى ەڭ ءىرى اگرارلىق وڭىرلەردىڭ ءبىرى جانە ەلەۋلى يندۋستريالىق الەۋەتكە يە. ءوڭىردىڭ ورنىقتى دامۋى عىلىمي تۇرعىدان نەگىزدەلگەن شەشىمدەردى, كليماتتىق تاۋەكەلدەرگە بەيىمدەلۋدى, رەسۋرستاردى ۇتىمدى پايدالانۋدى, ەميسسيانى ازايتۋدى جانە ەكولوگيالىق تەحنولوگيالاردى ەنگىزۋدى قاجەت ەتەدى», دەدى اقىلبەك كۇرىشباەۆ.
قوستاناي وبلىسى
